સમજી જા તું ...

કેમ ભાવનાઓ ને જરૂર પડે છે શબ્દો ની મને સમજી જા તું
શબ્દો છેતરે છે હું નહિ ,એ સત્ય સમજી જા તું ...

પ્રેમ ને ત્રાજવા માં કદી મપાય નહિ ,
માંગીશ એના કરતા વધુ મળશે,સમજી જા તું ...

મારી આંખો થી દિલ માં સમાયી ગયી તું
આ દ્વાર ને ભીંજવતા તું પણ ભીંજાઈ જઈશ ,સમજી જા તું ...

મારા અશ્રુ મારી પાસે જ રહેવાદે ,
હું ભીંજાવીશ  તને વ્હાલથી,પ્રેમ થી,ચુંબન થી સમજી જા તું ...

અફસોસ છે કે હું તારી પાસે નથી ,
મારા શ્વાસો ની વ્યથા સાંભળી સમજી જા તું ...

દર્પણ માં ખુદ ને શોધતા
ચેહરો તુજ દેખાય સમજી જા તું ...

રણ માં ઉડતી ધૂળ ની ડમરી
એમાં તે ખીલાવ્યું ગુલાબ ,સમજી જા તું ...

બાગ ના પીળા ગુલાબ પર બેઠેલો ભ્રમર
આ ગણગણતો પ્રેમ ,સમજી જા તું ...

હાથ માં હાથ નાખી જીવનપથ પર ચાલવા,
માંડશું ડગ સંગાથે, આ ભાવ સમજી જા તું ...

તર્ક ની તીક્ષ્ણ ધાર ને સમજણ ની મ્યાન માં મુકી ,
સમર્પણ કરતો પ્રેમ સમજી જા તું ...

મારું અને તારું આકાશ અલગ નથી,
બંને નું એક જ ભાવ વિશ્વ , સમજી જા તું ...

આ કાવ્ય કોણ લખે છે?
હું કે મારી ભીતર રહેલી તું , સમજી જા તું ...

--- સૌમિષા